قنادر قظيفة لهوا موديلات شتاء 2021
مجموعة تأخذو منها فكرة عن الموديلات الاخيرة
كما حبيت نعطيكم معلومات عن قماش القظيفة
كامل نعرفو مشاكل القاطيفة و البيزو -_- ف الخياطة يتعبو و صعاب و من الصعب الي تجيها نتيجة متقونة ... و حتا و ديري الحلول المؤقتة كيما سكوتش ف البيدبيش ولا تخيطي فوق الجرنال ولا الورق لكن تزيدي خدمة على خدمة ... هو حل يصلح مي خدمتو كثر منو
و ثاني مشكل الي هو كاين الي يخرجها مشكل ف خياطة الجوانب انو جهة مكمشة على جهة اخرى 🤦🤦
تقريبا ف الماشينة لكبيرة مايكونوش هاذ المشاكل بزاف .. لكن ف الماشينة الصغيرة الي يكونو اكثر
الاسباب : 🙋🙋
_ الي تكون فالماشينة
_ الي تكون ف يدين الخياطة 🤌🤌
_ و كاين الي تكون فالقماش نفسو
#الاسباب فالماشينة
اولا لازم تشري ابرة الخاصة بالبيزو كاين ف الماشينة الصغيرة و الكبيرة و تكون اكثر حدة على الابرة العادية
ثانيا : لابيدبيش ( ايلا درتي الابرة و مزالك المشكل ( مع انو ما نظنش راح يبقا المشكل ) لابيدبيش تاع النيلو ... تصلح للقماش السكاي و القاطيفة و البيزو في نفس الوقت
ثالثا : الصفيحة المعدنية ( سنين تاع الماشينة ) ما يخدموش ... و هنا لازم الخدام لانو راح تسرفلك الخيط من تحت + اذا عاونتي الماشينة و كسلتي لقماش راه يصرالك مشكل القاطيفة تتكسل كي تطلقيها تبان خياطة عيانة و يترخف الخيط
#الاسباب فيدين الخياطة
كي تكوني تخيطي ف القاطيفة ولا البيزو .. جامي تكسلي لقماش ولا تجبدي مع الماشينة من الخلف ... خليها هي تجبد وحدها و تخدم وحدها ... انتي ما عليك غير تحطي القطع مع بعض
بالنسبة للجوانب قصيتيهم مع بعض بالتسواوي و ف الخياطة خرجلك جانب اكثر من جانب... هذا يعني انك نتي كسلتي الجهة الي مقابلاتك على الجهة الي جاية ف الاسفل .. و بالتالي راح تجيك جهة مكمشة على الاخرى
#الحل : انك تخدمي بليزيبانقل و كل ما تقربي من النهاية تاع الجوانب تحطيهم مع بعض للاخير و تبقاي شاديتيهم فقط و تكملي تخيطي ...
#الاسباب ف القماش نفسو :
كاين نوع تاع قماش كاليتي عيااانة بزاف و يترولا فوق اللازم
هو بعد مهما درتيلو يبقا فيه مشاكل ... و هاذ النوعية عليك تجنبها ... 💁
ملاحظة : بالنسبة للمكواة ... تكون على درجة حرارة خاصة و تقريبا ف الاول و تكون مكواة تاع بخاار
متحطيش المكواة مباشرة على القماش لانها تخلف اثار فادحة
حاولي قدر الامكان ما تخليهاش لاطراس تاع الحديد
و تقدري تحطي قماش مقطن فوقها و تحددي 🙋
ليست هناك تعليقات: